ازاى تبقى رخم وخنيق

لو راكب فى باص أو ميكروباص وجنبك حد نايم اوعى تسيبه نايم
كل شوية اقعد قول وصلنا عشان يصحى مخضوض لو عمل اهبل صحيه وقوله مش انت نازل هنا بيتهيألى
لو مش نايم متسيبوش فى حاله برضه عيب عليك متجيشركز على سؤال واقعد اسألهوله كل شوية زى أنت نازل فين طب انت دفعت ولا لأ
لو قاعد هو جنب الشباك جوه وقالك عدينى قوله رجلى منملة مش قادر وخليه ينط زى القرد
أو قوله ماتنزل من الشباك
لو انت فى أتوبيس وقاعد على كرسى وجنبك ناس واقفة استمتع بقى وخدك وقتك
اتمطع بقى وقول ياسلام على الراحة الواحد مكنش عارف هيعمل أيه لو مش قاعد
لو العكس بقى اقعد اسأل كل واحد انت نازل فين واقعد قول بصوت عالى
ياجماعة محدش نازل قريب أصل انا عايز اقعد طول مانت واقف قول كده لحد مايقعدوك
لما الكمسرى يجى ياخد منك الاجرة اسأله على تمن كذا مكان
يعنى قوله هو لغاية الحتة الفلانية بكام طب لغاية الحتة دى بكام
اسأل على تمن كل الاماكن اللى تعرفها لحد مايقولك ياعم خلصنى رايح فين
قوله مانا عشان ابقى عارف بس وتقل فى العيار يمكن يسيبك ويمشى
لما يدى حد تذكرة قوله ورينى كده لو سمحت واقعد اتأمل فيها
لحد ما صاحبها يزهق ويشدها منك
فى مفتش بقى ساعات بيطلع يفتش على التذاكر وبيطلع على السريع كده وينزل
أنت بقى اوعى تديهاله علطول كده أزعل منك دور عليها ساعة حط ايدك فى جيوبك مية مرة هيقولك خلص يا استاذ قوله ثوانى كانت معايا والله
واقلع الجذمة ودور فيها وفى الاخر طلعها من بوقك بعد مايكون هو مات من الملل وقوله مش قولتلك
كفاية كده بقى حرام المفروض تنزل قبل الناس ماتموت منك
أستنى رايح فين أنت نازل عادى كده ولا كأنك رذل ولا حاجة
وأنت نازل هيبقى فى ناس واقفة أعمل نفسك مش عارف تعدى
وحاول تجاهد على قد ماتقدر وتضيع الوقت اللى تقدر عليه
لحد الناس ماتشيلك وترميك بعد ماتكون جبتلهم السكر ورفعت ضغطتهم
ازاى تبقى رزل فى الكليه
فى المدرج أرشق نفسك بين أتنين متعرفهمش وابتدى الشغل بقى أتعامل على إنك صاحبهم من قرن
يضحكوا على حاجة اضحك معاهم كده يعنى المهم تركز معاهم كأنك من بقيت أهلهم ولا خلفوك ونسوك
أو طريقة تانية أتلكك لكل اللى جنبك كل ماحد ينطق كلمة قوله لو سمحت أسكت عشان أفهم
لو مسكتش أنا هقول للدكتور والحركة دى رذلة ومستفزة جدا بس اشطه يعنى
وياسلام لو واحد وواحدة يبقى أنت كده جبت من الآخر
لو جنبك واحد بيكتب يبقى اتفتحتلك طاقة القدر اقعد اسأله وعطله ومتخليهوش يكتب سطرين على بعض
استلم أى حد واسأله المحاضرة هتخلص امتى ؟ وكل فيمتو ثانية كده اسأله الساعة كام اصل أنا زهقت
طبعا هو اللى زهق وطهق من الكلية وبيقول ياريتنى ماكملت تعليم وكره حياته كلها زى باقى الضحايا
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــــ
عايز تعمل دماغ حلوة روح على شباك شئون الطلبة المهم حاول تعمل أهبل وأنت داخل وعايز تقف أول واحد
هيرجعوك ورا تحاول تقف مكان أى حد وترذل على كله هما أصلا بيبقوا واقفين مش طايقين نفسهم
لو واقف تانى واحد كده مفيش مانع تزق اللى قدامك تلبسه فى الشباك الحديد وتقول الله ياجماعة ياللى ورا متزقوش
ومن قبل ماينطق ولا كلمة تقعد تقوله خلص يالا عشان غيرك ومتخليهوش يركز مع بتاع شئون الطلبة خالص
لما يجى دورك بقى بيبقوا عايزين يخلصوك ويكروتوك واللى واقفين وراك فى الطابور مستنينك تغور فى داهية بفارغ الصبر
خد وقتك كأنك بتحجز فى سينما و اسأل أسئلة كتير وكل مايقولك حاجة قوله مش فاهم معلش قول تانى فهمنى أعمل أيه بالظبط لحد ماتشل أكبر عدد ممكن
وبكده يبقى أنت مارست هوايتك وقضيت يوم رذل
هات بخاخه مطهر ديتول و أمشى ورا شخص فى اى حته ، و كل ما الشخص ده يمسك حاجه و يسيبها ... تروح راششها بالمطهر على طول
2 : و أنت بتتكلم فى موضوع أقطع كلامك و أدى انطباع أنك هاتكمل ... و ماتكملش ..."بس خلاص كده " .
3 : لما حد يشكى لك من حاجه قوله أنا عندى مشاكل أكتر منك.
4 : فى مطعم... بص للشخص اللى قاعد على ترابيزه جنبك و أنت ماسك لقمه فى ايدك و قوله "ممكن الطحينه بتاعتك ثوانى" ؟.
5 : و أنت واقف بتتكلم مع حد برق عينيك فجأه و أسأله "سمعت؟!" هيسألك "سمعت ايه؟!" قوله ولا حاجه ... خلاص راحت
6 : بعد عشر دقايق ، اعمل نفس الحركه تانى
7 : و انت بتتكلم مع شخص ، ماتبصش فى وشه أبدا
8 : و انت بتتكلم مع شخص ، افضل مركز فى وشه اوى .
9 : طول ما أنت قاعد مع زمايلك ، صفر موسيقى نشيد بلادى بلادى .
10 : علق فانوس كبير فى الشارع و حبال زينه ، بشرط ميكونش فى رمضان !!! .
11 : أستلف قلم من حد ، وحط القلم فى بقك ، و أعمل نفسك بتفكر و منهمك و أنت عمال تعضعض فى القلم !!! .
12 : و أنت فى المول ، ماتمشيش عادى ، لأ .. افضل نط لحد ماتوصل للمكان اللى رايحه .
13 : فى المترو امضغ لبانه بصوت عالى و انت واقف جنب حد بيقرا مجله او جرنان ، و أنت بتقرا معاه طبعا .
14 : اعزم ناس فى حفلات ناس تانيه "عيد ميلاد او خطوبه او فرح ..." .
15 : سيب اشاره العربيه الشمال شغاله لمده 5 كيلو متر من غير ماتلف .. و بعدين اطفيها فجأه و كمل طوالى >>>>>>>>>>>وإياك تبص وراك لأنك حتلاقي شعب مصر كلها جريت وراك
16 : فى حفله عيد ميلادك أطلب من ال D.jأنو يشغل أغنيه بعينها 18 مره ورا بعض .. "أنا بحب الأغنيه دى اوى يا جماعة" !! .
17 : لو واقف جنب حد بيعد فلوس و فى وسط ما هوا بيعد قول اى رقم عشوائى "862" .
18 : العب فى الوان التليفزيون لحد ما الصوره تبقى بنفسجى ، وتبقى الناس كلها لونها بنفسجى ، و اعزم اصحابك عالماتش عندك فى البيت .. و لو حد اعترض ، قوله "أنا شايف ان ده لون الحياه الحقيقى" !!!
19 : و أنت ماشى فى حته اى حاجه تقابلك طبل عليها .
20 : غير القناه قبل نهايه الفيلم او الماتش او المسلسل بخمس دقايق .
21 :lأضحك لواحده ماتعرفهاش فى الشارع وقولها بصوت عالى " ازيك .. عامله ايه؟

وبكده تبقى رخم

وكده اموت وانا مطمئن انى ربيت جيل من الرخمين

لا توبيك جامد جداااااااااااااااااا ومفيد. بصراحه يودى فى داهيه على طول

شكرا على مرورك

ههههههههههههههههههههههههههه
يا رخم
دا انا اتشليت وانا بقرأ الكلام دا
يبنى حرام عليك
دا احنا لو عملنا حاجه واحده من كل دا
هنشل اى حد قدمنا
مش هنرخم عليه بس
حراااااااااااااااااااااااااااااااااااااام

وهو ده المطلوب يابنى عيش رخم تموت مستور

عيش رخم تموت مستور ههههههههههه
اطمن يا قرصان انت بعد التوبيك دا اسمك هينكتب فى موسوعات الرخامة العالمية
واكيد هيضربوا بيك المثل فى الرخامة

هههههههههههههههه توبيك دمه خفيف بس مين إلى يعمل كده ؟؟؟؟؟؟؟؟؟؟؟؟

شكرا يا اسلام ع العلم دا
فعلا هوا دا العلم اللى الواحد يستفاد بيه
انت طلعت برنس

[quote="Naughty boy"]عيش رخم تموت مستور ههههههههههه
اطمن يا قرصان انت بعد التوبيك دا اسمك هينكتب فى موسوعات الرخامة العالمية
واكيد هيضربوا بيك المثل فى الرخامة [/qu



هههههههههههههههه لا يا عم احمد انا مش عايز اسمى يتسجل فى موسوعات الرخمه انا اصلا مش رخم

وشكر على مرورك

the master كتب:

هههههههههههههههه توبيك دمه خفيف بس مين إلى يعمل كده ؟؟؟؟؟؟؟؟؟؟؟؟

ياعم الرخمين كتير

شكرا على مرورك

prisonerdovetail كتب:

شكرا يا اسلام ع العلم دا
فعلا هوا دا العلم اللى الواحد يستفاد بيه
انت طلعت برنس

حبيب قلبى يا احمد وبعدين احنا عايزين ايه بعنى غير اننا نربى جيل من الرخمين يستطيعوا مجابهة العصر اللى احنا عايشينه

ونعم التربيه
انت خير مثال ع المربى البيض

وانا بالنيابه عن الجيل دا بشكرك جدا جدا جدا وبنقول زيد يا استاد ومتعنا

محدش هينساك من الجيل القادم يا قرصان انت بتعلمهم ازاى يوجهوا رخامتهم صح

شكر ا جمهورى العزيز واحب اقولكم انى دايما هكون عند حسن ظنكم فيا

هههههههههههههههههههههههههههههههههههههههههههههههههههههههههههههههههههههههه